У ноч з 5 на 6 ліпеня падчас Будслаўскага фэсту адбылася цэлая ўрачыстая праграма, у якой быў канцэрт для моладзі, працэсія са свечкамі і начная святая Імша, якую цэлебраваў арцыбіскуп Мінска-Магілёўскі Юзаф Станеўскі.
Вечарова-начную частку Будслаўскага фэсту распачала праграма для моладзі, падчас якой выступіў евангелізацыйны музычны гурт "Рыбы".
Затым, перад поўначчу, вернікі разам з усім духавенствам прайшліся ў святочнай працэсіі са свечкамі.
У ёй католікі таксама пранеслі копію абраза Маці Божай Будслаўскай вакол сквера каля Будслаўскага санктуарыя.
У гэты час вернікі спявалі таямніцы Ружанца.
Затым апоўначы адбылася начная святая Імша. Яе цэлебраваў арцыбіскуп Мінска-Магілёўскі Юзаф Станеўскі.
Пасля Імшы католікі ўсю ноч чувалі перад абразом Маці Божай Будслаўскай.
Марына Валасар, фота і відэа аўтара